27/11/2019 12:30
ՏԶՆԿ-ն ներկայացրել է ավտոպարկի թարմացմանն ու շրջակա միջավայր արտանետումների կրճատմանը միտված նախագիծ
Տնտեսական զարգացման նախաձեռնությունների կենտրոնը ներկայացրել է ավտոպարկի թարմացմանն ու շրջակա միջավայր արտանետումների կրճատմանը միտված նախագիծ, ինչպես նաև անդրադարձել թափոնների վերամշակման խնդրին. առաջիկայում ՏԶՆԿ-ն այն կներկայացնի ՀՀ կառավարություն և ԱԺ:
Նախագծի հեղինակ Նարինե Մեհրաբյանը առաջարկել է մի մեխանիզմ, որի կիրառման արդյունքում հնարավորություն կտրվի ձևավորել թարմ ավտոպարկ և խրախուսել մինչև 5 տարվա մեքենաների ներմուծումը ՀՀ:
«Այսօր խիստ կարևորվում է այնպիսի նախագծի ընդունումը, որը հնարավորություն կտա մեղմելու ավտոտրանսպորտի ներմուծման թանկացումների ալիքը, ինչպես նաև որոշակի առումով կանխարգելել աղտոտված, վնասակար նյութերի արտանետումը դեպի շրջակա միջավայր»,- նշել է ՏԶՆԿ տնօրեն Մարինե Առաքելյանը:
«2020թ.-ից երրորդ երկրներից ներկրվող մեքենաների հարկումը շեշտակի բարձրանալու է՝ կապված ԵԱՏՄ կարգավորումների և միասնական շուկայի հետ: Առաջարկում է եկամտահարկի որոշակի մասնաբաժինն ուղղել մինչ 5 տարվա մաշվածություն ունեցող մեքենա գնողների տոկոսագումարների մարմանը. արդյունքում կկարողանաք ավելի նոր մեքենա ձեռք բերել, ինչն էլ իր հերթին ավտոպարկի թարմացման կհանգեցնի: Ուզում եմ շեշտել, որ մենք ոչ թե ավտոներկրումն ենք ցանկանում խթանել, այլ բացառապես նոր կամ մինչև 5 տարվա մաշվածություն ունեցող մեքենաների ներկրումը»,- նշել է նախագծի հեղինակ Նարինե Մեհրաբյանը:
Նախագծի առաջարկը կայանում է հետևյալում՝
- մինչև 5 տարվա մաշվածություն ունեցող և 1001-1500 սմ3 ծավալի շարժիչ ունեցող մեքենայի ներկրման պարագայում աշխատողի եկամտահարկը 100%-ով ուղղել տոկոսագումարների մարմանը,
- մինչև 5 տարվա մաշվածություն ունեցող և 1501-1800 սմ3 ծավալի շարժիչ ունեցող մեքենայի ներկրման պարագայում աշխատողի եկամտահարկը 90%-ով ուղղել տոկոսագումարների մարմանը,
- մինչև 5 տարվա մաշվածություն ունեցող և 1801-3000 սմ3 ծավալի շարժիչ ունեցող մեքենայի ներկրման պարագայում աշխատողի եկամտահարկը 80%-ով ուղղել տոկոսագումարների մարմանը,
- մինչև 5 տարվա մաշվածություն ունեցող և ավելի քան 3000 սմ3 ծավալի շարժիչ ունեցող մեքենայի ներկրման պարագայում աշխատողի եկամտահարկը 70%-ով ուղղել տոկոսագումարների մարմանը:
Եկամտահարկի մասնաբաժնի աստիճանակարգմամբ էլ կենտրոնը ցանկանում է խրախուսել ոչ մեծ շարժիչ ունեցող մեքենաների ներկրումը՝ մթնոլորտը հնարվորինս քիչ աղտոտելու նպատակով:
ՏԶՆԿ տնտեսագետ Աննա Մակարյանը ներկայացրել է, որ նախաձեռնության ընդունման արդյունքում որքան կօգտվեն տարբեր չափի աշխատավարձ ստացող քաղաքացիները. «1,801-3,000սմ3 շարժիչի ծավալի մեքենայի ավտովարկի միջոցով մեքենա ձեռք բերելու դեպքում պետական բյուջեից հետ վերադարձվող եկամտային հարկի մեծությունը (80%-ի չափով) միջին աշխատավարձ ստացողի պարագայում առավելագույնը կկազմի շուրջ 495,000 ՀՀ դրամ, շուրջ 245,000 ՀՀ դրամ ստացողի դեպքում`547,000 ՀՀ դրամ, իսկ 300,000-ի դեպքում`շուրջ 672,000 ՀՀ դրամ»:
Տնտեսագետի համոզմամբ՝ երկարաժամկետ հատվածում ուտիլիզացիոն համակարգի ներդրման պարագայում ՀՀ-ի բյուջեում կարձանագրվեն լրացուցիչ մուտքեր: